الحقيقة اتسألت السؤال ده كتير جدًا الفترة اللي فاتت، وعشان كده حبيت أكتب بوست توضيحي للموضوع ده ككل.
خلي بالك المقال ده طويل، وأنت محتاج يبقى عندك صبر عشان تقدر تكتب أنت كمان 😀


تعالى نتفق على حاجة مهمة ونعتبرها عنوان كلامنا: “وراء كل شخص عظيم، محتوى عظيم!”
يعني إيه الكلام ده؟ يعني الكتابة ببساطة مش مسألة اختيار مواقع وخلاص، إنما فيه حاجات وخطوات ضرورية إنك تعرفها، هي اللي هتساعدك في رحلتك فعلًا.


عشان كده، هنبدأ بيها الأول، بعدين نتكلم عن المواقع والمنصات الوجودة. 

1- لازم يكون عندك محتوى تقدمه: قبل ما تفكر هتكتب فين أو إيه المقابل، فكر هتكتب إيه بالظبط، لإن ببساطة مفيش موقع هيقبل بأي مشاركة لمجرد رغبتك أنت الشخصية في الكتابة.والحقيقة إن امتلاكك لمحتوى خاص بيك هو اللي بيخلي عندك مساحة استمرارية دايمًا.
مش بقولك فكر في مواضيع كتير، لكن على الأقل موضوعك الأول يكون حاجة حلوة تقدر تنطلق بيها.

2- بصمة الكتابة: لازم تحاول يكون ليك بصمة في الكتابة، سواءً تكتب في حاجة مميزة عن الباقي، أو يبقى أسلوبك أنت هو المميز، عشان فكرة الأسلوب هي اللي هتساعدك تبني لنفسك اسم حقيقي في وسط الناس العظيمة الموجودة حاليًا.ومهم إنك تحافظ على بصمتك مع الوقت، متحاولش تبقى نسخة من حد تاني، ولا تخلي مكان معين يلغي بصمتك المميزة.


الموضوع ده بالظبط يتلخص في فكرة إنك تصنع brand لنفسك في الكتابة.

3- طبيعة الموقع: افهم طبيعة الموقع اللي أنت هتشتغل عليه، لإن كل موقع له سياسة وشروط معينة خاصة بيه، من ناحية عدد الكلمات أو شكل الموضوع، وحتى من شكل المقابل اللي ممكن تاخده من الكتابة.


والحاجات دي رغم إنها بسيطة جدًا لكن بتفرق في قبول موضوعك للنشر من عدمه أو لا، واستفادة الناس من الموضوع بعدها وقراءتهم ليه.
خصوصًا إن كل موقع له جمهوره وله طبيعة مواضيع تتوافق معاه، وده بتفهمه من إنك تقرأ الشروط، وتاخد جولة في الكتابات المعروضة في الموقع.

4- متفكرش في المقابل المادي من المرة الأولى: أغلب الناس بتبدأ الكتابة في مقالات “الرأي”، وغالبًا مفيش مواقع بتمنح مقابل مادي على النوع ده من المقالات، لكن الفكرة إن مقالات الرأي هي الانطلاقة الحقيقية ليك، وبتفتحلك طريق للكتابة.


ولذلك سؤال: هي الكتابة بتجيب فلوس؟ سؤال شبيه بالفخ، أو التعامل مع الموضوع على إنه هيبقى مربح من المرة الأولى هو تعامل غير سليم، لإنه بيحطك في خانة تقييم الكتابة بالمقابل المادي بس، وده مش صحيح أبدًا.


على المستوى الشخصي فضلت وقت كتير بكتب من غير مقابل، وحتى الآن مش كل المواقع اللي بشتغل فيها ده بيكون بمقابل.

5- ابني سيرة ذاتية لنفسك: وده الأهم من التفكير في المقابل المادي، إنك تشتغل على محتوى معين تقدر تتعرف بيه، ومستقبلًا ده اللي ممكن يخلي المواقع تفكر في إنها تستعين بيك بمقابل مادي، لإن صاحب الموقع مش بيدور على شخص بيعرف يكتب بس، لأ بيدور على شخص بيعرف يكتب وعنده إضافة ممكن يقدمها للموقع.


وبالتالي دايمًا قيم كتابتك في إطار إن كانت بتضيف لسيرتك الذاتية حاجة أو لا، وعشان كده نقطة رقم 3 و4 هيفيدوك في تحقيق ده.

6- حدد غرضك من الكتابة في المواقع: زي ما قولت مش دايمًا التركيز على المقابل المادي، ممكن يبقى التركيز إنك تبني سيرة ذاتية بوجودك في المكان ده، وممكن يبقى الغرض إنك تعمل علاقات كويسة مع أصحاب المواقع دي لحاجة تنفعك مستقبلًا، وممكن يبقى الغرض إنك توصل لمتابعين لكتاباتك على المواقع.

لما تشتغل على الموضوع بالشكل ده، هتلاقيه فرق معاك كتير جدًا.

7- الموضوع محتاج وقت: بلاش تتعامل مع الكتابة على إنها حاجة سريعة، هتدخل المجال ده وتكسب منه لحظيًا، باختلاف أشكال المكسب على فكرة، لأ ده الموضوع بيحتاج وقت منك وصبر كبير، وكل ما يكون المنتج بتاعك كويس، كل ما فرصتك بتكون أفضل.ونصيحتي لأي حد في البداية بتكون إنه محتاج يجرّب نفسه في أكتر من مجال، عشان يقدر يحدد بالظبط هو كويس في إيه. ولو عنده إجابة السؤال ده من البداية، يبقى يركز على إنه يجرّب الكتابة في مجاله بأكتر من شكل وفي أكتر من موضوع، ده اللي بيخلق عنده خبرة قوية.

8- التطوير الذاتي: طوّر من نفسك طول الوقت، بلاش تبقى حابب تتواجد في أماكن كتيرة بشكل عشوائي ومش منظم، وتسيب ده يجي على حساب تطويرك لنفسك، لإن التطوير ده هو اللي بيعلي مستواك تدريجيًا.
التطوير عمومًا أشهر طريقة له: اكتب كتير، واقرأ كتير. لذلك اربط دايمًا بين كتاباتك عشان تقدر تطوّر من نفسك مع الوقت. عشان كده مش ضد إنك تكتب في أماكن كتيرة، لكن زي ما قولتلك بلاش العشوائية.

من سنة فاتت أنا كتبت حاجة اسمها “دليل الكتابة” على موقع إضاءات، لو حابب إنك تقرأها قبل ما تبدأ هتفيدك جدًا في الرحلة 
دليل الكتابة من هنا: https://goo.gl/brXx48

ــــــــــــــــــــــــــــــــــــــ

دلوقتي نقدر ندخل على الجزء التاني، جزء المواقع والمنصات.


وحابب أفكرك دايمًا بشعارنا في البوست ده: وراء كل رجل عظيم، محتوى عظيم!
عشان ده اللي هيفرق في قبول مشاركاتك في المواقع، وبداية رحلتك الحقيقية في الكتابة، أو لا.

حاولت قدر الإمكان أجتهد في بحث المواقع، وإني أوصل لمواقع تقدر تفيدك فعلًا، ودول المواقع اللي وصلتلها، فيه مواقع تاني أعرفها لكن مفيش حاجة عن المساهمات الخارجية، وبالتأكيد فيه مواقع تانية معرفهاش من الأساس.


لكن أعتقد إن الـ20 موقع الموجودين دول كفاية.

1- AraGeek – أراجيكhttps://goo.gl/Cbbrkh ثم الإرسال هنا: arageek.guest@gmail.com
“أراجيك منصة مميزة جدًا ومن أكثر المنصات العربية انتشارًا، هتلاقي اللينك اللي أنا ضايفه بيشرح طبيعة الموقع، وتأكد من إنك فاهمها كويس، بعدين ابعتل على الميل، هتبقى فرصة طيبة لو اتنشر ليك مقال هناك.”

2- إضاءاتhttps://goo.gl/SN1Sc9
“إضاءات موقع قوي في نوعية المحتوى المقدمة عليه، ويُفضل إنك تبدأ معاهم وأنت عندك نوعية محتوى مميزة، عشان تقدر تستفيد من نظام الاستكتاب المدفوع عندهم، طبعًا عملية الاختيار بترجع لإدارة الموقع.”

3- Sasa Post ساسة بوستhttps://goo.gl/zmQRae
“من المواقع المفيدة ليك في مسيرتك إنك تكتب عليها، لو عندك إمكانية تبدأ بيه أو تخليه جزء من رحلتك هيبقى شيء كويس.
ممكن تتواصل معاهم من الميل ده: mypost@sasapost.com لو مش عارف تستخدم اللينك.”

4- المنصةhttps://goo.gl/x23GR4
“موقع المنصة موقع مختلف في فكرته، محتاج تستوعبها كويس قبل ما تضيف مقالاتك، والموقع بعد فترة معينة من الوقت بيقيّم المشاركات الموجودة عليه كلها، وممكن يتم دفع مقابل مادي لبعض الكتّاب عن مقالاتهم، بناءً على معايير الجودة والتميز في كتابتها.”

5- شبكة زدني للتعليمhttps://goo.gl/eyN6Us
“من المواقع التعليمية الجيدة جدًا، ولو أنت من المهتمين بمجال التعليم، ممكن تحاول توصل لشبكة زدني، كمان الموقع بيقدم مقابل مادي للمقالات، لكن لازم تكون مطابقة للمعايير المطلوبة، وعمومًا هو إضافة طيبة ليك ككاتب تعليمي.”

6- Journas – جورناسhttps://goo.gl/YzVQmU
“البوست ده: https://goo.gl/QiQJyq بيشرح طبيعة الموقع وتفاصيله بالظبط، وإزاي تقدر تستفيد منه في تحقيق أرباح لنفسك، وبنصح بيه جدًا، لكن اقرأ الشروط والشرح كويس قبل ما تبدأ.”

7- مدونات الجزيرةhttps://goo.gl/8jeZ48
“إضافة عضويتك أحيانًا بياخد وقت طويل، ولذلك مش بنصح بيه كبداية، لكن في رحلة الكتابة لازم تبقى عامل حساب مدونات الجزيرة إنك تكتب فيها في يوم من الأيام، عشان هتلاقيها إضافة ليك جدًا.”

8- عربي بوستhttps://goo.gl/1tscz2
“من المواقع المهمة في التدوين في الوقت الحالي في رأيي، هو امتداد للهاف بوست، وبشوفه بيعملك انتشار كويس ككاتب، زي مدونات الجزيرة.”

9- منشور Manshoorhttps://goo.gl/A3NLYC
“الحقيقة موقع منشور من أكتر المواقع القريّبة من قلبي بسبب طبيعة المحتوى المنشور عليه، فأكيد هتستفيد من الكتابة والاحتكاك بالكتّاب المميزين في الموقع.”

10- اليوم الجديد – ElYomnewhttps://goo.gl/KHf11d
“من المنصات الجيدة اللي ممكن تبدأ بيها الكتابة، لإنهم عاملين قسم مقالات الرأي عشان يدعموا أي حد حابب إنه يبدأ في مجال الكتابة، وكمان أحيانًا بيوفروا مكافآت مادية لبعض الكتّاب، بناءً على معايير بيتم توضيحها للكتّاب المنضمين للجروب الخاص بعد نشر أول مقال للكاتب.”

11- بالعربيhttps://goo.gl/zhYuof
“من المواقع اللي بتسمحلك تنشر قصص قصيرة، وده مش موجود ضمن المواقع اللي أنا ضايفها هنا، كمان اهتمامهم أكتر بالحاجات العلمية، وأي حد مهتم بالعلوم هيلاقي فرصة حلوة هنا.”

12- عالم الابداع: https://goo.gl/JcDFzo
“الموقع تركيزه في المواضيع العلمية أكثر، وبالتالي يُنصح بيه للناس اللي مهتمة بالعلوم كشيء رئيسي.”

13- المحطة – elmahattahttps://goo.gl/L1saiy
“من المواقع اللي بشوفها مناسبة جدًا لأي حد لسة بيبدأ، والموقع في تطور كويس من وقت للتاني ما شاء الله.”

14- NoonPost نون بوستhttps://goo.gl/z7BtXz

15- الرابحونhttps://goo.gl/PmaZPN
“موقع الرابحون مختص أكتر بالتسويق الإلكتروني وكل المواضيع المرتبطة بيه، ويُفضل إن يكون عندك خبرة في المجال عشان تعرف تكتب محتوى كويس.


إرسال المقالات بيتم على الميل ده: magdy@alrab7on.com

في البداية الكتابة بتكون تطوعية، لكن لو إدارة الموقع شافوا إن عندك شغف وقدرة على توصيل المعلومة بشكل صحيح، فممكن يكون فيه مقابل مادي واتفاق على شغل.

المقالات بيتم تصحيحها من إدارة الموقع قبل النشر، وبيتم كتابة اسم الكاتب في بداية المقال.”

16- رقيمhttps://goo.gl/osjdGV
“رقيم من المواقع المنطلقة مؤخرًا بمبدأ التدوين المفتوح، بمعنى إن أنت بتسجل على الموقع، وبتشتغل على حسابك الشخصي، والموقع بيتعامل بمبدأ “الرقمات” كمقابل عن المقالات، ومن المفترض إنّه حاليًا بدأ تحويلها لمقابل مادي بالفعل.”

17- مجلة التنويري – Altanweerihttps://goo.gl/ejnEBw
“مجلة التنويري من المنصات الحلوة في كتابة مواضيع محددة، زي الفلسفة الإسلاميّة، فلسفة الدين، التربية والتعليم، وأنا بحب مقالاتهم وبستفيد منها جدًا الحقيقة.”

18- Daily Dose of Science – الجرعة اليومية من العلوم:https://goo.gl/Yj5keT
“فرصة حلوة للتطوع في فريق شبابي بيشتغل على جميع أنواع العلوم الموجودة، وأعتقد إن ليهم مستقبل حلو، خصوصًا في الصعيد، باعتبارهم أكبر فريق علمي موجود في الصعيد.”

19- Makalcloud – مقال كلاود: https://goo.gl/3ThXUk

20- المحتوى: https://goo.gl/ioC4UZ
“من المواقع المحببة إلى قلبي جدًا، مختلف وفريد في طريقته، والمشاركة فيه بتحتاج لخبرة سابقة في الكتابة، عشان كده فضلت إنّه يكون في آخر الترشيحات، لكن هتستفيد منه كتير جدًا في رحلتك.”

ــــــــــــــــــــــــــــــــــــ

آخر حاجة عايز أقولها، محدش يقدر يضمنلك إنك هتاخد فلوس في وقت من الأوقات، أو إنك هتستفيد متابعة شخصية، لذلك بلاش تعلّق آمالك على الكتابة إنها تبقى مصدر دخل ليك من أول مرة، الموضوع بيجي مع الوقت غالبًا.
لكن الأساسي دايمًا هو إنك تبقى مبدع ومتميز، ده هيفتحلك طرق كتير في الكتابة، وهو ده الضمان الوحيد الموجود لإنك هتقدر تحقق اللي أنت عايزه.

أي شخص أنت منبهر بيه في مجال الكتابة على الإنترنت حاليًا، بيقدر يوصل لوضعه من خلال الخطوات اللي اتكلمنا عليها، ومن إنه فاهم كويس أهمية المحتوى اللي بيقدمه، وعشان كده جملة “وراء كل شخص عظيم، محتوى عظيم!” هي أصدق تعبير عن رحلتك مع الكتابة، وإنك تحاول دايمًا تبقى مميز في حاجة معينة.

أتمنى يكون الدليل مفيد إن شاء الله، ولو فيه أي استفسار أنا تحت أمركم  

أكونت معاذ يوسف : https://www.facebook.com/moaaz.yousef.74

 

ترك الرد

Please enter your comment!
Please enter your name here