المحتوى يبان من عنوانه | إزاي تكتب عنوان يشد القارئ

أعرف إزاي تكتب عنوان يشد من أول مرة.

0
1820
How to write compelling headlines

جملة شهيرة بنسمعها كتير “الجواب بيبان من عنوانه”، جملة كتير بنسمعها سواء كان كتاب أو جواب أو حتى بيت.

طيب إنت متخيل إن كمان “المحتوى بيبان من عنوانه”!

الانطباع الأول يبقى

العنوان زي الانطباع الأول لشخص قابلته في الشارع أو كنت محدد معاه ميعاد.

عارف سندوتش البرجر اللي بيخطفك من أول شكله لحد مكوناته؟

ده بالظبط اللي بيحصل مع العنوان ومحتويات المحتوى اللي العنوان هيكون العامل الأساسي في أن اللي بيقرأ يكمل أولأ!

لازم تبقى كاتب ومخطط عنوان مبدأي للمحتوى بتاعك بنسبة كبيرة … ممكن تغير فيه لكن النسبة الأكبر منه هو الي هيظهر للقارئ.

إنت بيكون معاك أصلاً معلومات ولو قليلة لكن كفيلة إنها تفهمك إنت هتكتب عن إيه ولمين، تقدر من خلالها تصيغ فكرة للعنوان الخاص بيك.

ولازم عنوان يكون بيوفي الوعد ..

وعد لمين؟

إنت بتكتب محتوى لأي براند عن أي حاجة، لازم عنوان يكون فيه نبذة مختصرة جداً عن المحتوى دا وهل القارئ هيستفيد منه ولا لا.

مثلا لو بتكتب عن إزاي تاخد كورسات في اللغات وتقدم فين أو إزاي يقدر يوصل لأماكن بشهادات معتمدة…

ميكنش المحتوى بتاعك عن “احجز دلوقتي في المكان الفلاني واستفيد من معلوماته”، لأنه مش شرط أنه عايز يحجز دلوقتي ولا هو حابب يروح بس هو عايز ياخد فكرة عن الأماكن الي ممكن يشوفها لما وقته يسمح.

ولكن تقدر تشجعه أنه يحضر لما تكتب ” 5 حاجات جديدة هتستفيد منهم لما تحضر في ورك شوب كتابة المحتوى”

كدة يبقى أنت حددت رقم معين وكمان بتوعده بمعلومات جديدة هتقدمها في الورك شوب ولازم تكون صادق في وعدك له.

اختيار الكلمات صنعة

بيقولك دايمًا لو عايز تخش قلب حد، كلمه باللغة اللي يحبها وفاهمها.

إزاي؟ اختيار الكلمات الأكثر شيوعاً في محركات البحث وفي طريقة سهلة جداً تقدر تستخدمها علشان تعرف الناس بتدور على إيه.

أول طريقة

صديقنا جوجل، تقدر تستخدم محرك البحث البسيط في معرفة أكثر الكلمات اللي بيتم البحث عنها زي الصورة دي:

 

Copywriting-Google-Search-The-Copywriter
Copywriting-Google-Search-The-Copywriter

تاني طريقة 

وهى أداة لطيفة جدًا أسمها Answer The Public

ودي بيكون فيها معظم الأسئلة اللي الناس بتسألها على جوجل في شكل أسئلة وكمان تقدر تنزل ملفات منها في شكل أكسيل أو PDF.

 

وده لأن محركات البحث “SEO” بتهتم جداً بأهمية الكلمات الموجودة في عناوين المحتوى، ودا الي يخلي المحتوى الخاص بيك يا في قمة محركات البحث أو لا.

إنت حابب تكتب في مجال معين وعايز تجيب تفاعل… يبقى لازم تختار الـ Keyword الأكثر استخداماً.

على سبيل المثال:

عايز تتكلم عن إعلانات السوشيال ميديا

تبدأ تدور على الجملة دي بالتحديد وتشوف نسبتها قد إيه في البحث هل هي كبيرة تقدر تتكلم عليها ولا لا.

لو كبيرة يبقى خلاص هتاخدها وتكمل عادي … لو قليلة هتبدأ تشوف بديل تاني لنفس الفكرة لحد ما توصل للنسبة المتوسطة الي تقدر من خلالها تكتب وانت مطمن.

في tool اسمها ubersuggest’s  لطيفة تقدر تتعرف من خلالها على الكلمة الي بتدور عليها هل ليها نسبة كويسة ولا لا.

اختار البلد الي عايزها هو بيشتغل عربي وانجليزي اكتب الكلمة وشوف الـ SEO Difficulty قد ايه.

ملحوظة: في العربي هتلاقي في الاغلب الـ SEO Difficulty مكتوب أنها Easy ودا مش حاجة وحشة هي بردو بيكون فيها نسب بحث عالية من القراء والمستخدمين.

والآن مع لحظة الحقيقة

أنواع العناوين

عنوان الـ How To 

 كلمهم عن الفوائد 

في أي مقال ليه علاقة

الـ How To 

حاول تدخله من ناحية الفايدة الي هيطلع بيها من الآخر…

لأن هو معندهوش وقت يقرأ عن حاجة برة دايرة اهتمامه.

حاول تحط التاتش بتاعك بكلمات تخلي القارئ يشوف إنت بتتكلم عنه إيه زي “أبسط، أسهل، أسرع..”

يعني لو مثال لعنوان: إزاي تتعلم إنجليزي بأسرع وقت..”

لو المحتوى لغة عربية فصحى:”تعلم كيف تتقن اللغة الإنجيلزية بأسرع وقت..”

 خلّي عندهم فضول 

لو إنت عايز تملى فضولهم وخلاص بقى لازم يشوفوا الكلام الي أنا شقيان فيه…

حاول وقتها تستخدم أسلوب التجربة…

مثال: “تجربتي في تعلم الإنجليزي خلال 6 شهور بعد ما سبت الشغل”

مثال باللغة العربية الفصحى: “تجربتي بتعلم اللغة الإنجليزية في خلال ستة أشهر وبدون عناء”

عنوان الأرقام 

مش أوقات كدا تلاقي أرقام قبل العنوان نفسه…

يعني مثلا: 16 فايدة للشوكولاتة الداكنة مكنتش تتوقعها …

تلاقي عليها نسب تفاعل ومشاهدات وزيارات وكومنتات وشير ويااااااه الدنيا حلوة أوي..

أيوة السبب في دا إيه؟ 

 القارئ بيحب يشوف قدامه List بالحاجات الي هيقرأها

هيقدر يفتح عشان هيقرا 16 فايدة بجد مش مجرد رقم محطوط وخلاص…هو عايز يعرف إيه هما..

هل في طرق للكتابة نوع العناوين دي؟

أيون طبعاً في…

1-طلع خبرتك في العنوان

بمعنى إنك لو متخصص في المجال دا يبقى تحاول تخلي عنوانك في نوع من الخبرة الي أنت اكتسبتها..

مثال: هل تعرف إيه أكتر 6 طرق فعالة لتحصيل المعلومات وقت المذاكرة؟

إنت قلت 6 ولازم يكونوا العدد دا، وفي كل نقطة فكرة مختلفة عن الي قبلها.

2-الطريقة الكلاسيكية

الي هي الطريقة التقليدية شوية في كتابة العناوين… هي بتجيب تفاعل بردو بس حاول تجدد ..

على نفس المثال: 6 طرق فعالة لتحصيل المعلومات وقت المذاكرة

فرقت إيه؟

إنك ذكرت الرقم في الأول والصياغة كأنها معلومة ومش سؤال وإنت مش عارف إجابته.

3-أنت الحل

مع ذكر الرقم، حاول تذكر المشكلة ومش الحل علشان تحسس القارئ إنه محتاج يقرا معلومتك.

مثال: 4 مشكلات تسبب سوء التركيز وقت المذاكرة

 دور جوا نفسك

ممكن تحاول تجمع بين العدد والسؤال الشخصي…

مثال:10 أنواع من الطلاب وقت المذاكرة.. أنت مين فيهم؟

هو هيدخل يقرا ويشوف أنا مين من الناس دي

هل أنا الدقيق في المعلومة، ولا الي بيحب يلخص ولا مين بالظبط….

خليته يقرا المحتوى كله وفي نفس الوقت يكتشف شخصيته.

 الميكس اللذيذ

إيه رأيك لو علمنا خلطبين العدد و الـ How To

مثال: إزاي تقدري تزودي نسبة تركيز أطفالك وقت المذاكرة…6 طرق مختلفة اتعرفي عليها

 اذكر السبب

من ضمن العناوين الي تخلي القارئ ينتبه ليها هو السبب.

مثال: 8 أسباب تخليك تعرف ليه لازم تنتظم في نومك وقت المذاكرة

كتابة العناوين فن محتاج لتدريب وتجربة أكتر من عنوان واختبار كل عنوان ومدى تأثيره على العميل، المقال ده مجرد البداية لمقال أقوى عن كتابة العنوان بطريقة تشد وتجذب الأنتباه.

وفي النهاية هذا المقال مجرد وسيلة من الوسائل المعلوماتية وبحاول ابسط المعلومة على قد ما اقدر “صدقني 😀 ” … تقدر تشوف الي يناسب البراند الخاصة بيك ويعجبك وسيب الي مش مناسب معاه.

المصدر: How To Write Magnetic Head Lines – Copyblogger

ترك الرد

Please enter your comment!
Please enter your name here