موقعي لسه متأرشفش لحد دلوقت، إيه السبب؟ السؤال ده اتسألته كتير وجاوبت عليه أكتر من مرة ولكن المرادي هتكلم بشكل تفصيلي أكتر وهجاوب على الموضوع ده من بدايته عشان لو حد لسه مُبتديء يحاول يفهم ويستوعب، والبداية الحقيقية للإجابة على السؤال ده هوا: إزاي محرك البحث بيشتغل؟ أو بمعنى أدق: إزاي جوجل بيشتغل؟.

مرحلة الزحف: دي المرحلة اللي خوارزميات جوجل بتزحف فيها نحو موقعك ( GoogleBot ) وكُل المواقع التانيه، زيها بالظبط زي المكتبة اللي بتستقبل ملايين م الكُتب، جوجل هنا بيزحف في مليارات الصفحات على الويب عشان تيجي تاني مرحلة وهيا الأرشفة، هنا بتبدأ خوارزميات جوجل بأرشفة الصفحات اللي زحفت إليها وترتيبها بشكل منظم عشان لما تيجي تالت مرحلة وهيا مرحلة “البحث” تبدأ تظهر النتايج للمُستخدم بالشكل اللي كُلنا بنشوفه، دي العملية كلها باختصار.

طيب لما دي هيا العملية اللي بتتم سواء في الزحف أو الأرشفة، السؤال اللي سألناه في الأول بقى: ليه جوجل ممكن يأخر في أرشفة موقعي؟ هنا بقى ييجي الكلام عن معيار مهم جدًا وهوا تكلفة الزحف Crawling Budget.

علشان جوجل تبعت خوارزمياتها وتزحف لموقعك فيه عامل اسمه “تكلفة الزحف” بتحطه في اعتبارها وهوا إن عملية الزحف والأرشفة دي بتكون مكلفة عليها وقبل م تزحف لازم تشوف إذا كان موقعك يستحق ولا لا؟ أو تديله الأهمية الكبيرة أو أهمية أقل وهكذا، في البداية بتبدأ جوجل تزحف لموقعك بشكل بسيط عشان تجس النبض وتعرف وتبدأ تكتشف موقعك، لو تمام يبقى هتكثف بعد كده عملية الزحف والأرشفة لكن لو فيه مشاكل بتبدأ خوارزميات جوجل في تجاهل موقعك وتروح لموقع تاني غيره أكثر أهمية، طيب هنيجي للسؤال الأهم: إيه الحجات اللي بتخلي خوارزميات جوجل تبعد عن موقعي؟.

الروابط الاسبام:

الروابط الخارجية تعتبر م العوامل المهمة فعلا في تحسين ترتيب أي موقع لكن لو اتعملت بشكل اسبام مش بس هتكون سبب في تجاهل خوارزميات جوجل لموقعك، دي هتكون سبب أكيد للقضاء على موقعك من أساسه، عشان كده لو حريص إن جوجل يزحف لموقعك ويأرشفه بشكل طبيعي حاول إنك تكون حذر في بناء أو اكتساب الروابط الخارجية.

المحتوى المُكرر:

تكرار المحتوى يعتبر من أبرز العوامل اللي بتخلي جوجل يتجاهل الزحف لموقعك بالشكل الطبيعي لأنه بيلاقي محتويات وصفحات وروابط مكررة بتخليه مش عارف إيه الصح بالظبط؟ وإيه اللي مفروض يأرشفه فالنتيجة إنه بيتجاهل الاتنين، عشان كده خلي بالك إن ميكنش عندك محتوى أو صفحات مكررة، زي من نحن، التواصل، سياسة الخصوصية أو حتى المقالات العادية.

المحتوى المنسوخ:

حصرية المحتوى عامل مهم وضروري عشان تقدر تـ Rank في جوجل، وعلى النقيض تمامًا المحتوى المنسوخ أو بمعنى أدق “المسروق” من المواقع التانيه من أبرز الحجات اللي هتضر بموقعك بشكل كبير، ومن أكبر العوامل اللي بتخلي جوجل يتجاهل موقعك بشكل كامل دا إذا لم يعاقبه ويمنعه من الظهور تمامًا في الـ Search Results.

طيب علشان أتأكد بشكل كامل إن موقعي تمام وإن خوازميات جوجل أو أي محرك بحث تاني هتأرشفه بشكل طبيعي فيه 6 حجات لازم أخد بالي منها وأحطهم في اعتباري وأنا شغال، 3 منهم Technical والتلاته التانيين مُشتركين في عملية الـ SEO بشكل عام.

  • ملف Robot.txt

الملف ده المسؤول بشكل مُحدد وواضح عن “منع” أو “السماح” لخوارزميات Google أو أي محرك بحث تاني من أرشفة موقعك أو عدمه، وهنا إنت تقدر تحجب بعض الصفحات أو حتى كل صفحات موقعك من الأرشفة، ودا بيكون على الإمتداد التالي: yoursite.com/robot.txt وهتلكم عنه بشكل مُفصل في مقالات تانيه.

  • ملف الـ SiteMap

والملف ده بتعمل خلاله زي خريطة كاملة لصفحات موقعك الداخلية، وبالأخص الصفحات الأساسية زي من نحن، صفحة التواصل، سياسة الخصوصية، شروط الاستخدام، الأسئلة الشائعة الخ، ودا أنصح لما تعمل أي تحديث كبير في موقعك إنك تعمل أبديت وإن كان فيه Tools كتيرة وخاصة لمُستخدمي الووردبريس بتمكنهم من عمل الأبديت ده بشكل تلقائي.

  • Fetch as Google

لو عملت تغيير في صفحة عندك بالموقع وحابب إن التغيير ده يظهر بسرعة وخايف لجوجل يأخر في عملية الأرشفة للصفحة دي فإنت تقدر تُحط رابط الصفحة دي في الـ Search Console عندك وتبعتها لجوجل من خلال Fetch as Google واللي على أساسها عملية الزحف للصفحة دي بتكون أسرع شوية.

طيب أنا عندي كُل شيء تمام وعايز أقول لجوجل إني موقعي حلو وجاهز أهو للأرشفة وأستحق إنك تجيلي وتعملي أبديت كُل ساعة حتى مش بس كُل يوم، هنا هتيجي لأهم 3 عوامل أنا شايفهم هيساعدوك بشكل كبير في عملية الأرشفة وكمان في السيو SEO وتحسين ترتيب نتايج موقعك.

  • اكتساب الروابط الخارجية بشكل طبيعي من مواقع ذات دومين أثورتي عالي، متشابهة نوعا ما مع مجال موقعك، الاسبام سكور بتاعها يكون قليل أو حتى مافيش، مواقع ذات ثقة بمحتوى قوي، بمعنى أدق اهتم بجودة الباكلينك.
  • السوشيال مُلازم بشكل كبير للسيو SEO الاتنين مرتبطين ببعض، وشغلك على السوشيال ميديا هيساعدك جدًا في بناء براند قوي وهيكون عامل مهم في تحسين ترتيب نتايج موقعك في محركات البحث.
  • أما المحتوى الجيد في موقعك، غير المنسوخ أو المُكرر فطبعًا ده أقوى شيء تقدر تكسب بيه ثقة خوارزميات جوجل وثقة الزائر كمان، فاهتمامك بالمحتوى دليل على قوة موقعك ودليلك الأول عشان تقدر تتربع على عرش النتائج الأولى.
  • باختصار:

    إهتمامك الدايم بتطوير وتحسين موقعك، سواء من ناحية المحتوى أو الشكل وطبعا تجربة المُستخدم هيساعدك جدًا من ناحية السيو، ومعيار زي “تكلفة الزحف” هيكون في صفك على طول في حين إنه هيبقى عائق كبير قدام مواقع بتنسخ وبتسرق وبتكرر وبتحشي أي كلام عشان مجرد الصعود أو الرغبة في الصعود لأن شعار جوجل الدائم اللي هتكتشفه مع الوقت في شغلك في السيو: البقاء للنتيجة الأفضل.

ترك الرد

Please enter your comment!
Please enter your name here