شهاب علي يحكي لكم | إزاي نكتب حلقة لـ Rick and Morty | ذا كوبي رايتر

0
3801
rick and morty style
how to write like dan harmon

إزاي نكتب حلقة لـRick and Morty؟ علشان نعرف دا هنروح لواحد من صناع المسلسل، دان هارمون، بس ليه هارمون تحديدًا؟ معظم المهتمين بالكتابة يعرفوا بشكل أو بآخر عن (جوزيف كامبل)، وكتابه «البطل بألف وجه»، اللي بيتناول الـ Monomyth، أو بالاسم الشائع، رحلة البطل. كامبل لاحظ تشابهات بين القصص الأسطورية للأمريكيين الأصليين، وبين القصص الموجودة في المسيحية، رغم أن مفيش أي رابط من أي نوع بين الثقافتين ممكن يفسر التشابه، دا اللي بعدين ألهم كامبل لملاحظة أن نمط معين في كل القصص، من غيره مش هنقدر نشوفها كقصة. نرجع لهارمون.. هارمون عمل إطار للكتابة إسمه Story Circle، وهو عبارة عن تبسيط لرحلة البطل الخاصة بكامبل، هارمون طبق الإطار دا في شغله على مسلسلات زي Rick and Morty وCommunity. العناصر الموجودة في أُطر كامبل وهارمون، هنلاقيها في أي قصة، من الأساطير القديمة، ومسرحيات شكسبير، لأفلام الكوميكس، ليه؟ لأنه، زي ما قولنا، من غير العناصر دي، احنا كبشر مش هنقدر نعترف بالعمل دا كقصة. 

 

إزاي تكتب قصة البطل في خطوات بسيطة

خلينا الأول نشوف عناصر الـ Story Circle 

  1. story circle for rick and morty by dan harmon
    story circle for rick and morty by dan harmon
  1. شخصية في منطقة أمان.
  2. لكن عندها احتياج معين.
  3. بتدخل وضع غير مألوف.
  4. بتتكيف معاه.
  5. بتحقق هدفها.
  6. بتدفع تمن دا.
  7. بترجع لوضع المألوف. 
  8. بتتغير.

وممكن نلخصهم كالتالي: لما يكون، عندك احتياج لشيء ما، بتروح مكان ما، عشان تحاول توصل له، بتلاقيه، بتكسبه، وترجع، والأمور بتتغير.

ممكن نطبق دا على قصة معروفة، وليكن مثلًا قصة همام في أمستردام

  1. همام بيمارس حياته الطبيعية. 
  2. لكن عنده احتياج: يسافر هولندا يشتغل، عشان يخطب حبيبته.
  3. بيدخل وضع غير مألوف: التأشيرة بتطلع مزورة، وحبيبته بتتخطب لجمعة إبن أم جمعة.
  4. بيتكيف مع الأحداث دي، وبيجيب تأشيرة جديدة.
  5. بيسافر هولندا.
  6. بيدفع تمن ده، فلوسه وعنوان خاله وباسبوره يضيعوا.
  7. بيرجع لوضع مألوف: بيتجوز رقية، وبيمتلك المطعم الخاص بيه.
  8. همام اتغير.
هنا نقول ملحوظة: مش لازم كل القصص يكون فيها العناصر الثمانية كلهم، يعني ممكن الشخصية متتغيرش، أو مترجعش لوضعها المألوف مثلًا، لكن مش هتقدر تاخد كتير منهم، وإلا زي ما قولنا مش هتبقى قصة من الأساس، وهنشوف دا كمان شوية في مثال من Rick and Morty نفسه. ممكن دلوقتي يخطر في بالنا سؤال، ليه القصة، علشان تبقي قصة، يكون فيها عناصر معينة بترتيب معين؟ هارمون بيجاوب: «لأن مجتمعنا، كل عقل بداخله، والحياة نفسها، ليهم إيقاع معين، ولما بتلعب على الإيقاع ده، بيكون له صدى». فيقصد إيه هارمون بالايقاع والصدي؟ هو بيشرح وبيقول:

 

Story structure circle
Story structure circle

الإيقاع الأحيائي/البيولوجي، من حياة وموت. الكون حوالينا بيموت. لكن في الأرض، الأمور بتمشي في الاتجاه المعاكس، البشر بيزيدوا، الجروح بتتداوي، الأغبي بيبقي أذكي. الكوكب نفسه، بعد ما كان في يوم من الأيام غير قابل للحياة، النهارده في عدد مهول من الكائنات، إزاي دا بيحصل؟ عن طريق الموت. الكائنات الأعلى بتفترس الكائنات الأدني، وبتزدهر مع الوقت، لحد ما يجي كائن أعلى منها، وهكذا. دا بيخلي الحياة تتطور وتنتشر، وده اللي خلى البشر يكون عندهم العقل ده، اللي ممكن في يوم من الأيام يمكنهم من نشر الحياة في كواكب تانية ميتة.

الإيقاع النفسي، من وعي ولاعي. عقلنا شبه البيت، فيه طابق علوي وطابق سفلي. الطابق العلوي -الوعي- الحياة تمام فيه، مكان مألوف، بتقابل أصدقائك..إلخ. الطابق السفلي -اللاوعي- هو مكان مظلم، مكان فيه كل الأفكار اللي متقدرش تفكر فيها. لكن في كل الأحوال سعادتك، وقواك العقلية، بتعمتد على رحلات عرضية للأنا بين الطابقين، عن طريق التأمل، الجنس، العنف أو قصة كويسة. 

ده الإيقاع النفسي: وعي- لاوعي – وعي -لاوعي..إلخ

الإيقاع المجتمعي، من نظام لفوضى. المجتمع هو صورة مكبرة من البشر، لكن بدل من وعي في الطابق العلوي، هيكون نظام، وبدل لا وعي في الطابق السفلي، هيكون فوضى. وزي ما الصحة العقلية للإنسان بتعتمد على رحلات عرضية للانا بين الطابقين، في المجتمع بتعتمد على رحلات لأشخاص حقيقين، للمجهول، والرجوع بأفكار. في أكثر الأشكال الدرامية، بنقول علىهم أبطال، لكن كل يوم في أفراد بتدخل للمجهول، وبترجع بأفكار جديدة (أو منسية) زي: العلماء، المدرسين، الرسامين..إلخ. 

وبشكل آخر، المجتمع صورة مكبرة من البشر، في أنه بيموت، لما بيكون في منافسة مع مجتمع تاني، المجتمع الخاسر يؤكل ويموت، المجتمع الفائز بيزدهر وينمو. إيقاع المجتمع: نظام -فوضى – نظام -فوضى..إلخ.

دلوقتي بنفهم أن الحياة، ضمنها البشر، والمجتمعات اللي أنشأوها، رايحة لنفس الإيقاع، لو قصتك هتروح لنفس الإيقاع، مهما كان نوع قصتك، سواء كانت رواية عظيمة، أو قصة إعلانية بهدف البيع، هتعمل «صدى/رنة» هتاخد الأنا بتاعة جمهورك في رحلة للّاوعي. وهتخليهم، على حد تعبير هارمون، يقولوا YUM!

ممكن ناخد مثال من Rick and Morty، الحلقة السادسة، الموسم الأول. ملحوظة، احنا ممكن نطبق الـ Story Circle على كل شخص في القصة مش البطل بس وهنشوف دا دلوقتي على جيري ومورتي، وكمان ممكن نطبقها على كل Act بل وكل مشهد كمان، ونفتكر القصص مش “لازم” تتبع كل العناصر، بس مش هنقدر نشيل كتير منهم. في الحلقة السادسة، مورتي كان عاوز يقرب من جيسيكا لكن مش عارف، فبيروح لريك علشان يساعده في ده، اللي بدوره اداله مادة كيميائية تخلي أي حد يحبه.

 

هنتابع في الحلقة دي خطين، خط مورتي وخط جيري، الأول مورتي: 

1-مورتي في المدرسة.

2-لكنه محتاج حاجه، محتاج جيسكيا تُعجب بيه.

هنا مورتي هيتخطي مرحلتين، المرحلة رقم 3 لانه مش بيدخل وضع غير مألوف، ورقم 4 لإنه ولا بيتكيف معاه، لكنه بيروح علطول لرقم 5، علشان كده التمن اللي هيتدفع هيكون أكبر بكتير.

5-مورتي بياخد اللي محتاجه، عن طريق الـمادة اللي حضره ريك. 

6-مورتي وريك بيدفعوا تمن كبير؛ العالم كله حواليهم اتدمر والناس بتتحول لأشكال غريبة.

7-مورتي وريك مبيلاقوش حل تاني علشان يرجعوا لوضعهم المألوف غير أنهم يلاقوا بُعد تاني هما فيه حلوا الموضوع لكن في نفس الوقت بيموتوا.

8-مورتي بيتغير، بعد ما بيدفن جثته من البُعد التاني، والحلقة بتنتهي بشكل مظلم.

خط مورتي مش الـ Story Circle المثالية، على عكس خط جيري، اللي فيه العناصر التمانية موجودين: 

1- جيري بيمارس حياته الطبيعية.

2- لكنه محتاج يعرف حاجه، هل بيث بتحبه ولا لأ.

3- بيدخل وضع غير مألوف وهو رايح يحاول يشوف بيث بتخونه ولا لأ، وهو رايح بيقابل الكائنات الغريبة اللي اتحولوا ليها البشر. 

وهنا جيري بيبدأ يتحول لبطل في سياق القصة الخاصة بيه.

4- بيتكيف مع الوضع، ويقتل كل الكائنات لحد ما وصل للمستشفى.

5- بيحقق هدفه وهو بينقذ بيث من زميلها في الشغل بعد ما اتحول هو كمان لكائن غريب .

6- وبيث وسَمر- بيدفعوا تمن لده؛ العالم بقي كله كائنات أغرب.

7- بيرجعوا لوضعهم المألوف كعائلة بشكل عام.

8- بيتغير جيري وبقي بطل، وبيث بتحبه.

ممكن نشوف مثال تاني من Rick and Morty، بيشرحه هارمون نفسه في الفيديو دا (3 دقائق).

هل معنى كدا أن كل القصص هي نفس القصة؟ بطريقة ما، أيوه، نفس البناء، زي ما كل المباني نفس المبنى كهيكلة، لكن كتابة القصة ما زال عمل إبداعي، زي الهندسة المعمارية، وأوضح دليل على دا Rick and Morty نفسه. أطر العمل لكتابة القصة كتير، منهم زي ما قولنا رحلة البطل لكامبل، وفي الـ 3 Acts Structure وغيرهم. إستمتع بالموسم الرابع، وحلل حلقاته، وGet schwifty. 

مصادر: https://channel101.fandom.com/wiki/Story_Structure_101:_Super_Basic_Shit

ولو عايز تسألني أي سؤال ده لينك الأكونت بتاعي: https://www.facebook.com/shehabdinaly

 

ترك الرد

Please enter your comment!
Please enter your name here